Аввал хабар қилинганидек, интернет нашрлар ва ижтимоий тармоқларда жорий йилнинг 11 июнь куни Тошкентдаги "Пахтакор" стадионида U-23 Осиё кубоги чорак финали доирасида Ўзбекистон – Ироқ ўйинларини ёритишга борган ЎзММАга аъзо "Севимли" телеканалининг мухбири ва тасвирчисига Ички ишлар органлари ва Миллий гвардия ходимлари томонидан куч ишлатилгани ҳақида маълумотлар тарқалди.
Ахборот ва оммавий коммуникациялар агентлигининг маълум қилишича, бундай хабардан сўнг Бош прокуратура, Миллий гвардия ва ИИВга сўров юборилган.
Бугун, 13 июнь куни "Севимли" телеканалида мазкур ҳодиса юзасидан учрашув ўтказилди. Унда телеканал директори Жалолиддин Сафоев ва бошқалар иштирок этди, дея хабар бермоқда Zamon.uz' нашри.
Қайд этилишича, йиғилишда қатнашган ЎзММА раҳбари Шерзодхон Қудратхўжа журналист ва тасвирчига куч ишлатган орган ходимларига чора кўришни сўраган.
"Биз бундай ҳолатда зўравонлик ва куч ишлатишни тўғри деб билмаймиз. Бундай буён медиа билан ишланадиган тадбирларга ИИВ ва Миллий Гвардиядан малакали, савияли, психологияси, денёқараши кенгроқ одамларни жалб қилишсин. Мен ИИВ дан илтимос қилардимки, бизнинг медиа ходимларимизга нисбатан шундай куч ишлатганларга нисбатан чора кўрилсин ва уларга белгиланган тартибда жазо тайинлансин",-дейди у.
ЎзММА раҳбари, шунингдек, икки томоннинг профессионал вазифасини бажаришида шундай можароларнинг келиб чиқиши бу соҳада ҳали кўп ишлаш кераклигини кўрсатишини таъкидлайди.
Маълумот учун, ИИВ матбуот котиби калтакланган тасвирчининг ҳолидан хабар олиш учун “Sevimli” телеканалига келган. Шоҳруҳ Ғиёсов вазирликдаги ислоҳотларни, уларнинг фаолиятини журналистларсиз оммага етказа олмаслигини айтган.
"Ҳозир текширув ўтказиляпти. Бизда бор бўлган бирламчи маълумотларга кўра, жамоат тартибини сақлашга жалб этилган ИИВ ва Миллий Гвардия ходимларининг барчаси қандай ҳолатда ўзини тутгани, вазиятни қанай омиллар юзага келтиргани ўрганиляпти. Албатта ҳар бир ҳолатга тўлиқ ҳуқуқий баҳо берилганидан кейин айбдорларни аниқлаб, уларга нисбатан чора кўрилади",-дейди у.
