ИИВ Киберхавфсизлик марказининг хабар беришича, Нарпайлик йигит ўз одамларга “Samsung А-72” телефонини ютиб олганини айтиб, карта маълумотлари ва телефонига келган SMS'даги кодни сўраган.
Осонгина "ўлжа"га айланиб қолган Сурхондарё вилояти Бандихон туманида яшовчи фуқаро шундан сўнг ИИБга ариза билан мурожаат қилган. У Telegram мессенжери орқали “Техномарт Акция” номли профил эгаси “Samsung А-72” русумли телефон аппаратини ютиб олдингиз деб, фирибгарлик йўли билан “Ҳумо” банк картасида бўлган 1,5 миллион сўмни ечиб олганини аризасида қайд этган.
Олиб борилган тезкор-қидирув тадбирлари натижасида сурхондарёлик фуқаронинг банк картасидан фирибгарлик йўли билан пулларни ечиб олган шахс Самарқанд вилояти, Нарпай туманида яшовчи, 2005 йилда туғилган, вояга етмаган С.У. экани аниқланган.
Суриштирув давомида, С.У. сурхондарёлик фуқародан ташқари яна 27 нафар фуқаронинг банк картасидаги пулларни ўзлаштириб олгани фош этилган.
Ҳозирда ушбу фуқарога нисбатан жиноят иши қўзғатилиб, тергов ҳаракатлари олиб борилмоқда.
