Сенат раисининг биринчи ўринбосари Содиқ Сафоев президент Шавкат Мирзиёевнинг қатағон қурбонлари хотирасига бағишланган маросимдаги нутқига Россия ОАВларида берилган муносабатларни “популистик ваҳима” деб атади.
"Президент Шавкат Мирзиёевнинг қатағон қурбонлари хотирасига бағишланган маросимдаги нутқига Россия ОАВларида берилган “муносабатлар”ини ўқиб чиқдим.
Мустабид тузум қатағон қурбонлари хотирасини ёд этган Ўзбекистон президентининг мувозанатли, босиқ ва ўта самимий нутқига мутлақо ноадекват муносабат. Ўзи мунозара нима ҳақида? Мустабид тузум шафқациз ва бераҳм бўлганлигими?
Ёки ҳалок бўлганлар ҳақиқатан ҳам ғайриинсоний қатағон қурбонлари бўлганлигими? Ақли тўғри ва хотираси аниқ бўлган ҳеч қайси инсон у ёки буни сўроқ қила олмайди.
Тузумга қарши, Ватан озодлиги учун ўз овозини баланд кўтаришга журъат этган минглаб юртдошларимиз учун полигон ва қабристон бўлиб қолган жойда ўтган маросимда мен ҳам қатнашдим. У чин қалбдан, ёруғ ва тантанали, қандайдир самимий, инсоний тарзда ўтди.
Айнан шу жойда жаллодлар томонидан ўз ўлимини жасорат билан қабул қилганлар олдидаги қарзимизни инсоний равишда қайтардик. Бу энди шов-шувли сиёсийлаштириш ва популистик ваҳима учун сабабми? — деб ёзди Содиқ Сафоев Twitter’даги саҳифасида.
Шунингдек, Қонунчилик палатаси Спикери ўринбосари Алишер Қодиров рус ҳамкасбини нотуғри талқин этишдан тийилишга чақирмоқда.
“Шавкат Мирзиёевнинг куни кеча қилган маърузаси Россия Давлат думаси депутати Константин Затулиннинг асоссиз талқинига суяниб, хато хулосаларга сабаб бўлибди.
Давлат раҳбари тарихий фактларга асосланиб, яқин ўтмишнинг қора кунларини эслатиб ўтди. Ўша қора кунларда халқимизнинг энг илғор фикрловчи қатламларининг яксон қилинганини эсламаслик, келажакда бу каби хатоларни такрорланишига олиб келиши мумкин.
Президент нафақат ўзбек, балки ўша даврда совет давлатида яшаган барча миллатларнинг зиёлиларига нисбатан қилинган ваҳший ноҳақликлар ҳақида гапирди. Буни англаш ва тўғри талқин қилиш учун катта тарихчи бўлиш шарт эмас, менимча.
Ҳамкасбларимга шундай ҳам мураккаб бўлган муҳитни яна мураккаблаштирадиган, минтақадаги тинчлик ва осойишталикка путур етказадиган талқинлардан тийилишни тавсия қиламан. Зеро бундан ҳеч ким ютмайди!” - дейди Қодиров.
