Ижтимоий тармоқларда Сирдарёда тадбиркор аёлнинг ҳарбий қисмда шартнома асосида очган тикув цехи ёпилганлиги ҳамда офицерлар таркибига мансуб ҳарбий хизматчилар ўртасида келишмовчилик юз бергани тасвирланган видео тарқалди.
Ҳолат юзасидан Мудофаа вазирлиги ахборот хизмати расмий маълумот берди.
Таъкидланишича, ҳақиқатан ҳам Сирдарё вилоятида жойлашган ҳарбий қисм инфратузилмаси ўзгартирилиши сабабли фуқаро Н.А. Ходжимуратовага ҳарбий қисм ҳудудида тадбиркорлик фаолияти билан шуғулланиши учун ижара шартномасига асосан ажратилган жой (тикув цехи) ўрнига ҳарбий қисм ҳудудидан бошқа жой тақдим этилган ҳамда тадбиркорнинг норози бўлиб берган даъво аризаси суд томонидан рад этилган.
