Фирдавс Фридунович Абдухаликов Вазирлар Маҳкамаси ҳузуридаги Ўзбекистондаги Ислом цивилизацияси маркази директори этиб тайинланди. Бу ҳақда Бош вазир матбуот котиби Бекзод Ҳидоятов хабар қилди.
Шу муносабат билан Шаазим Шоисламович Миноваров ушбу лавозимдан озод килинган.
Маълумки Янги Ўзбекистонда Президентимиз Шавкат Мирзиёев раҳнамолигида маданият ва илм-фанни ўрганиш ҳамда асраб-авайлаш масалалари давлат аҳамиятига эга бўлиб, мазкур илмий-тадқиқот ишларига алоҳида эътибор қаратилмоқда.
Фан доктори Фирдавс Абдухолиқов Ўзбекистон илм-фани ва маданиятини модернизация қилиш соҳасидаги кўзга кўринган намояндалардан биридир. Унинг кўп йиллик фаолияти маданий меросни асраб-авайлаш, илғор технологияларни қўллаш орқали ёдгорликларнинг 3D-нусхаларини яратиш ва навқирон авлодни ўз она юрти тарихи ва маданиятини ўрганишга кенг жалб этувчи мультимедиа ташаббусларини ривожлантиришга қаратилган кенг кўламли лойиҳаларни қамраб олади.
Фирдавс Абдухолиқов тадқиқотчи сифатида Ўзбекистоннинг қадимий ва илк ўрта аср қўлёзмаларини ўрганиб келган. Унинг ушбу ноёб манбаларга ёзилган шарҳлар тарзидаги китобларни тайёрлашга қўшган ҳиссаси илгари номаълум бўлган кўплаб илмий фактларга ойдинлик киритади. Ф. Абдухолиқовнинг саъй-ҳаракатлари ва илмий фаолияти туфайли кўплаб қўлёзмалар янги талқинларга эга бўлиб, кенг оммага тақдим этилди. Унинг асарларида замонавий олимлар ва китобхонларга қўлёзмаларнинг мазмуни ва аҳамиятини яхшироқ тушунишга ёрдам берадиган батафсил шарҳлар мавжуд. Мазкур китоблар пухта ўрганилган ва батафсил шарҳланган нашрлар бўлиб, уларда нафақат асл матнлар, балки уларнинг мазмуни, моҳияти ва маъносини тушунтирувчи шарҳлар ҳам мавжуд. Ушбу асарлар кўплаб қадимий ва илк ўрта аср қўлёзмаларини нафақат мутахассислар, балки кенг омма ҳам ўргана олиши учун имконият яратди. Энг машҳур шарҳлари сирасида “Катта Лангар Қуръони”, “Ҳусайн Бойқаро девони”, “Равзат ус-сафо”, “Темур тузуклари”, “Қўзғалмас юлдузлар китоби”, “Зафарнома” ва “Меърожнома” қўлёзмалари тадқиқини мисол қилиб келтириш мумкин.
