Эрон Ислом Республикаси президенти Сайид Иброҳим Раисий фожиали тарзда вафот этганидан кейин бугун – 2024 йил 28 июнь, жума куни Эрон Ислом Республикасида ҳамда давлатнинг хорижий мамлакатларда очилган сайлов участкалариданавбатдан ташқари президент сайловлари бўлиб ўтди. Жумладан, Ўзбекистон Республикаси ҳудудида вақтинча яшаб турган эронликлар Эрон Ислом Республикасининг Тошкентдаги элчихонасида очилган сайлов участкасига келиб, мамлакат президентлигига кўрсатилган 4 нафар номзоддан ўзлари хоҳлаган биттасини танлаб, овоз беришди.
Эрон Ислом Республикаси конституциясига кўра президент вафот этган тақдирда 50 кун ичида навбатдан ташқари президент сайловлари бўлиб ўтади. Шунгача бўлган муддатда президентнинг биринчи ўринбосари вақтинчалик президент вазифасини бажарувчи сифатида фаолият кўрсатади.
Эрон Ислом Республикасининг Тошкентдаги элчихонаси телефон орқали суҳбатда мазкур элчихонада ўтказилган ушбу муҳим тадбирни ташкиллаштиришда конструктив ёрдам бергани учун Ўзбекистон Республикаси ҳукуматига чуқур миннатдорчилик изҳор этди.
