Исроил ҳарбий-ҳаво кучлари Байрутнинг жанубий чеккасидаги Дахия туманига олтита зарба берди.
Ливаннинг ННА ахборот агентлиги хабарига кўра, Ливан пойтахтининг жанубий қисмида Ливан Ҳизбуллоҳ ҳаракатининг таянч нуқтаси сифатида танилган Даҳия тумани Исроил самолётлари томонидан зарбага учраган.
Қайд этилишича, Ал-Губейри ҳудудидаги объектга 3 марта зарба берилган, Ҳурейк ҳудудидаги бино ҳам нишонга олинган.
Гувоҳларнинг Anadolu нашрига айтишича, Исроилнинг Даҳия ҳудудига қилган ҳужумлари ниҳоятда шафқатсиз бўлиб, минтақадаги биноларга жиддий зарар етказган.
Ҳалок бўлганлар ёки ярадорлар ҳақида ҳеч нарса маълум қилинмаган.
Эрталаб Исроил армияси Ал-Губайри ва Ҳурайк ҳудудларидаги олтита бинони эвакуация қилишни талаб қилувчи огоҳлантириш берди.
Исроил-Ливан чегарасида Исроил армияси ва Ҳизбуллоҳ ўртасида назорат остидаги тўқнашувлар 2023 йил 8 октябрдан бери давом этмоқда.
2024 йил 23 сентябрда Исроил ҳаво кучлари Ливан жанубидаги шаҳарлар, шунингдек, Бекаа водийси ва Баалбек шаҳрига юзлаб зарбалар берди.
Ливан Соғлиқни сақлаш вазирлиги маълумотларига кўра, 2023 йил 8 октябрдан бери жами 3287 киши, жумладан, 203 нафар бола ва 644 нафар аёл вафот этган. Яна 14222 нафар мамлакат аҳолиси жароҳатланган.
Исроил армиясининг 27 сентябрь куни Байрутга берган зарбаси натижасида "Ҳизбуллоҳ" ҳаракати бош котиби Ҳасан Насруллоҳ ҳалок бўлди.
