Хитойда собиқ партия котиби ва “Хитой банки” директорлар кенгаши раиси Лю Ляньгэ ўлим жазосига ҳукм қилинди. У лавозимлари, хизмат мавқеси ҳамда ваколатларидан фойдаланган ҳолда коррупцияда, турли молиявий лойиҳалар ва кадрлар бўйича ноқонуний ёрдам бериш ҳамда ноқонуний кредитлар берганликда айбланган. Бу ҳақда Хитойнинг давлатга тегишли “Синьхуа” ахборот агентлиги ХХР Бош прокуратурасига таяниб маълум қилган.
Маълумотларга кўра, Ляньгэ қарийб 121 миллион юан, яъни 16,8 миллион доллар миқдорида пора олган.
Бундан ташқари, собиқ мансабдор қонун талабларини бузган ҳолда, малакасиз компанияларга умумий қиймати 3,32 миллиард юандан ортиқ кредитлар берилишига нохолис ёрдам бергани, натижада 190,7 миллион юандан ортиқ асосий қарз йўқолишига сабаб бўлгани суд томонидан аниқланган.
Собиқ мансабдорга ўқилган ҳукм икки йилга кечиктирилади. Суд Лю Ляньгэни бир умрга сиёсий ҳуқуқлардан маҳрум қилиб, ноқонуний йўллар билан олинган барча мулкларини давлат фойдасига мусодара қилган.
Икки йиллик муддат ўтгач, агар бу муддат ичида маҳкум бошқа жиноятларни содир этмаса, унга берилган ўлим жазоси умрбод озодликдан маҳрум қилиш жазоси билан алмаштирилади.
