Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси ҳамда Тошкент вилояти Ички ишлар бош бошқармаси ходимлари томонидан Қуйи Чирчиқ тумани ҳудудидан оқиб ўтувчи Чирчиқ дарёси ҳудудида рейд тадбирлари ўтказилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар қилди.
Рейд давомида қум-шағал аралашмалари давлат рақами ечиб олинган юклагич ёрдамида давлат рақами “01 М 019830” бўлган юк транспорт воситасига юклаб берилаётганлиги аниқланди.
Ҳолатга инспекторлар томонидан аниқлик киритилганида юк транспорт воситаси ҳайдовчиси қум-шағал аралашмаларини шу ҳудудда жойлашган “М.Г.Ф.” МЧЖга қарашли тош майдалаш цехига олиб бориб тўкаётганлигини маълум қилди.
Ўзбекистон Республикаси Вазирлар Маҳкамасининг 2022 йил 23 ноябрдаги “Норуда материалларни ноқонуний қазиб олишда табиий обектларга етказилган зарарни ҳисоблаш тартибини такомиллаштириш тўғрисида”ги 666-сонли қарори билан тасдиқланган низом талабларига асосан, ҳолат натижасида табиатга 65 млрд 323 млн 200 минг сўм зарар етказилганлиги маълум бўлди.
Шунингдек, техника воситалари Қуйи Чирчиқ туманида жойлашган жарима майдончасига вақтинча жойлаштирилди. Тўпланган ҳужжатлар эса ҳолатга ҳуқуқий баҳо бериш учун Тошкент вилояти прокуратурасига юборилди.
Маълумот учун, Ўзбекистон Республикаси Президентининг “Сув ҳавзаларида норуда материалларни қазиб олишни тартибга солиш чора-тадбирлари тўғрисида”гифармонига кўра, 2024 йил 1 майдан бошлаб Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга муддатсиз мораторий жорий қилинган.
