АҚШ, Канада ва Мексика мезбонлигида ўтаётган FIFA Жаҳон чемпионати баҳсларида ўзбекистонлик ҳакамларга яна бир масъулиятли вазифа ишониб топширилди.
Ўзбекистон футбол ассоциацияси маълум қилишича, FIFA рефериси Илгиз Танташев бошчилигидаги ҳакамлар бригадаси мусобақанинг «С» гуруҳидан ўрин олган Шотландия ва Марокаш миллий терма жамоалари ўртасидаги баҳсни бошқаради.
Учрашув 20 июнь куни Тошкент вақти билан соат 03:00 да старт олади.
Илгиз Танташевга ён чизиқларда халқаро тоифадаги ҳакамлар Андрей Сапенко ҳамда Тимур Гайнуллин ёрдам беради.
Қайд этиш жоиз, ўзбекистонлик ҳакамлар сўнгги йилларда халқаро майдонда фаол иштирок этиб келмоқда. Хусусан, Илгиз Танташев FIFA ва Осиё футбол конфедерацияси тасарруфидаги нуфузли мусобақаларда мунтазам ишлаб келаётган тажрибали ҳакамлардан бири ҳисобланади.
Жаҳон чемпионати каби энг йирик футбол мусобақасида ўзбекистонлик ҳакамлар жамоасига навбатдаги ўйиннинг ишониб топширилиши мамлакат ҳакамлик мактаби учун муҳим эътироф сифатида баҳоланмоқда.
