Рақобатни ривожлантириш ва истеъмолчилар ҳуқуқларини ҳимоя қилиш қўмитаси Uzbekistan Airways ва Silk Avia авиакомпанияларини устун мавқега эга деб топди. Бу бўйича 13 декабрь куни қўмита раисининг тегишли буйруғи қабул қилинган. Бу ҳақда "Spot" хабар берди.
Қайд этилишича, Uzbekistan Airways ҳамда таркибига Silk Avia кирувчи Uzbekistan Helicopters шўба корхонаси шахслар гуруҳи сифатида маҳаллий йўналишларда йўловчи ташиш бозорида устун мавқега эга деб тан олинган. Хусусан, уларнинг бозордаги улуши 40 фоиздан ортиқни ташкил этади.
Бундан ташқари, Uzbekistan Airways халқаро йўналишларда йўловчи, юк ва почта ташиш хизмати бозорининг 40 фоиздан ортиғини эгаллайди. Ҳар иккита ҳолат "Рақобат тўғрисида"ги қонуннинг тегишли моддаси билан устун мавқега эга, дея эътироф этиш учун асос бўлади.
Иқтисодий концентрация ва иқтисодиётда давлат иштирокини назорат қилиш бошқармасига 3 кун ичида Uzbekistan Airways ва Uzbekistan Helicopters компанияларига тегишли хабарнома юбориш топширилган. Ҳозирда Uzbekistan Airways йўловчилар ва юкларни ташиш, почта ташиш хизмати, Uzbekistan Helicopters эса қишлоқ хўжалиги авиацияси хизматлари бозорида устун мавқега эга компаниялар сифатида реестрга киритилган.
Товар ёки молия бозорида қуйидагилар устун мавқе деб эътироф этилади:
- агар хўжалик юритувчининг ёки шахслар гуруҳининг рақобатчилари мавжуд бўлмаса;
- агар хўжалик юритувчининг ёхуд шахслар гуруҳининг бозордаги улуши 40 фоизни ва ундан ортиқни ташкил этса;
- агар хўжалик юритувчи ёки шахслар гуруҳи табиий монополия субъекти деб эътироф этилса;
- агар хўжалик юритувчига ёки шахслар гуруҳига муайян товарларни ишлаб чиқариш ёки реализация қилиш ёхуд олиш учун белгиланган тартибда мутлақ ва эксклюзив ҳуқуқ берилган бўлса.
Охирги календарь йилда товарларни реализация қилишдан олинган тушуми БҲМнинг 30 минг баравари (11,1 млрд сўм) дан камроқни ташкил этувчи хўжалик юритувчининг ёки шахслар гуруҳининг товар ёки молия бозоридаги ҳолати устун мавқе деб эътироф этилмайди. Бундан табиий монополия субъектлари, маҳсулотларининг нархлари давлат томонидан тартибга солинадиган хўжалик юритувчилар мустасно.
Хўжалик юритувчининг ёки шахслар гуруҳининг товар ёки молия бозоридаги устун мавқейи эътироф этилган кундан уч кунда ваколатли давлат органи бу ҳақда уларга хабарнома юборади, мазкур хўжалик юритувчининг ёки шахслар гуруҳининг товарларига нисбатан нархлар давлат томонидан тартибга солинган тақдирда эса бу ҳақда нархни тартибга солувчи органга ҳам хабар беради.
