19 декабрь куни тушга яқин Тошкент шаҳрининг Янги Сергели ва Қипчоқ кўчалари чорраҳасида 132-йўналишда ҳаракатланадиган Mercedes-Benz автобусида ёнғин содир бўлди. Бу ҳақда Фавқулодда вазиятлар бошқармаси матбуот хизмати хабар берди.
Маълум қилинишича, хабар соат 11:51 да келиб тушган, воқеа жойига иккита ёнғин-қутқарув экипаж жўнатилган. Улар соат 11:55 да етиб борган ва ёнғин соат 11:57 да ўчирилган.
Ҳодиса оқибатида қурбонлар йўқ, дейилади хабарда.
Бу бир суткадан камроқ вақт ичида содир бўлган иккинчи шундай ҳодисадир. Чоршанба куни кечқурун ҳам Юнусобод туманида 169-йўналишда ҳаракатланаётган Mercedes-Benz автобусида ёнғин содир бўлганди. "Тошшаҳартрансхизмат"нинг хабар беришича, бунга қисқа туташув сабаб бўлган.
