Қашқадарё вилояти Экология, атроф-муҳитни муҳофаза қилиш ва иқлим ўзгариши бошқармаси, вилоят прокуратураси ҳамда вилоят ИИБ томонидан навбатдаги назорат рейд тадбири ўтказилди.
Рейд тадбирида Касби туманида яшовчи фуқаро Х.Н. томонидан яшаш хонадонида 2 бош итолғи қуши ҳеч қандай рухсатномасиз сақлаб келинаётгани маълум қилинди.
Ҳолат юзасидан фуқарога нисбатан далолатнома тузилиб, қушлар реабилитация қилиш ва вақтинчалик қонуний тўхтамга келгунга қадар сақлаб туриш мақсадида Самарқанд вилоятидаги "Зарафшон" миллий табиат боғига топширилди.
Ноқонуний ҳаракат натижасида, Х.Н. томонидан ҳайвонот дунёсига 1 миллиард 687 миллион 500 минг сўм зарар етказилганлиги маълум бўлди.
Маълумот ўрнида, итолғи қуши йўқолиб бораётган тур сифатида Ўзбекистон Қизил китоби, Табиатни муҳофаза қилиш халқаро иттифоқининг Қизил рўйхати ҳамда CITES Конвенциясининг II иловасига киритилган. Глобал популяцияси 2010 йилда 5,4–15,4 минг жуфт эканлиги қайд этилган.
