Россия президенти Владимир Путин газни Польша орқали Европа давлатларига етказиб беришни таклиф қилди. Бу ҳақда “Коммерсантъ” хабар берди.
Путиннинг сўзларига кўра, Украина орқали газ транзити бўйича шартнома янги йилга бир неча кун қолганда узайтирилмайди. Москва ҳар қандай контрагент билан шартнома бўйича транзитни давом эттиришга тайёр. Украина Россиядан ташқари ҳар қандай давлатдан газни Европага етказиб беришга розилигини айтган.
“Шартнома йўқ ва уч-тўрт кун ичида уни тузиш мумкин эмас. У бўлмайди”, деди Путин.
У Россия ҳеч қачон Европага газ етказиб беришдан бош тортмаганини ва “иқтисодий масалаларни сиёсийлаштирмаслик” тарафдори эканини таъкидлади.
“Польша ўз ҳудуди орқали маршрутни ёпди — у ерда фаол маршрут ҳам бор, унга ҳеч ким зарар етказмаган, ҳеч қандай портлашлар бўлмаган, у ишлаяпти, фақат тугмани босиш кифоя — шунда ҳаммаси Польша ҳудуди орқали ўтади. У Ямал-Европа деб аталади ва тўғридан-тўғри Польша ҳудудидан ўтади. Марҳамат, эртага ишга туширинг — биз етказиб берамиз”, деди Россия президенти.
Украина ҳудуди орқали Россия газини етказиб бериш бўйича шартнома 2024 йил охирида тугайди. Украина уни узайтиришни истамаслигини маълум қилган. “Газпром” билан транзит бўйича келишув 2019 йилдан бери амал қилмоқда.
Бундан ташқари, Россия нефтини Украина орқали Европа иттифоқига “Дружба” нефть қувури орқали ҳам етказиб беради. Украинанинг “Укртрансафта” ва Россиянинг “Транснефть” компаниялари ўртасидаги шартнома 2029 йилгача амал қилади.
