Европа Иттифоқи Тожикистоннинг учта "Спитамен Банк", "Душанбе Сити Банк" ва "Коммерсбанк Таджикистана" банкларини "қора рўйхат"дан чиқарди.
Аввалроқ ушбу банклар Россияга қарши санкцияларни четлаб ўтишга кўмаклашганликда айбланган эди. Қарор Тожикистон ва Европа ҳамкорлари ўртасидаги музокаралардан сўнг қабул қилинган.
Тожикистон Миллий банкига кўра, бу қадам мамлакат банк тизими ривожига туртки беради. Шунингдек, Европа Иттифоқи қарори вазирликлар ва банклар билан муносабатлар яхшилангани натижаси сифатида баҳоланган.
Эслатиб ўтамиз, ушбу банклар Россияга қарши 19-санкциялар пакети доирасида рўйхатга киритилган эди. Улар Россия иқтисодиётини қўллаб-қувватлаш учун молиявий операцияларда иштирок этганликда гумон қилинган.
23 апрель куни эса Европа Иттифоқи Россияга қарши 20-санкциялар пакетини тасдиқлади. Унда портлар, ўнлаб танкерлар, криптовалюта платформалари ҳамда Россия ҳарбий саноатига алоқадор шахс ва компаниялар ҳам қамраб олинган.
