Тошкент метросида “MyID Palm” кафт расми бўйича тўлов тизими ишга туширилди.
Йўловчини биометрик идентификация қилиш учун кафтдаги томирлар ҳосил қилган расмни сканерлаш технологияси қўлланилади. Тизим маҳаллий ишлаб чиқувчилар томонидан Транспорт вазирлиги, "ATTO" транспорти тўлов хизмати ва "Octobank" билан ҳамкорликда яратилган.
Ишлаб чиқувчилар фойдаланувчи маълумотларини ишончли ҳимоя қилишни ваъда қилишмоқда. Технология рухсатсиз кириш ва биометрик профилларни сохталаштиришга йўл қўймайди, дея таъкидланади хабарда.
“MyID Palm” сканерлари Чилонзор линиясининг “Олмазор"дан “Буюк ипак йўли"гача бўлган 12 та ер ости станциясида синов режимида ишламоқда. Яқин вақт ичида тизим қамрови барча станцияларга кенгайтирилиширежалаштирилган.
Тизимдан "ATTO" транспорт картаси ва ўрнатилган сервис иловаси бўлган смартфон мавжудлигида фойдаланиш мумкин. Бунинг учун биометрик профиль яратиш ва улар мавжуд бўлган метро бекатларидан бирида инфокиоскда кафтларни сканерлаш талаб этилади.
Бундан ташқари, "Octobank" мобил иловасида “MyID Palm” функциясини ишга тушириш режалаштирилган. Унинг фойдаланувчилари йўл ҳақини тўлаш учун исталган банк картасини улаши мумкин.
