Самарқанд вилояти Иштихон туман суди 13 январь куни Оқдарё сув омборида ёриқлар пайдо бўлгани ҳақида ёлғон ахборот тарқатишда гумонланган шахслар устидан суд бўлиб ўтди. darakchi.uz суд ҳужжати билан танишди.
Қайд этилишича, 1988 йилда туғилган Ж.Ҳ. 2025 йил 10 январь куни Оқдарё сув омборининг жанубий-ғарбий қисми қирғоғида сув омбори ишчи ходимлари томонидан жорий таъмирлаш ишларини олиб борилаётганини ўзининг телефонига видео тасвирга олган.
Унда "Мана Иштихон тумани сув омборида сув тошиб кетишига оз қолди, сув омборам кетай деди" деб, 2025 йил 10 январь куни соат 19:00 ларда М.П. билан биргаликда ушбу жамоат тартибига ҳамда хавфсизлигига таҳдид солувчи ёлғон ахборотни, яъни видео тасвирини ижтимоий тармоқлар орқали турли гуруҳ ва каналларга жойлаштириб тарқатишган.
Ж.Ҳ. ва М.П.нинг мазкур ҳуқуқбузарликни содир этишдаги айблари ўзларининг суд мажлисидаги кўрсатувлари, далолатнома, тушунтириш хатлари ҳамда ишда тўпланган бошқа объектив далиллар йиғиндиси билан тўлиқ ўз тасдиғини топган.
Суд ҳукмига кўра, Ж.Ҳ. ва М.П. Маъмурий жавобгарлик тўғрисидаги кодекснинг 202−2-моддаси 2-қисмида (Жамоат тартибига ёки хавфсизлигига таҳдид солувчи ёлғон ахборотни тарқатиш) назарда тутилган ҳуқуқбузарликни содир этган деб топилди ва уларнинг ҳар бирига БҲМнинг 20 баравари миқдорида яъни 7 500 000 сўмдан жарима жазоси тайинланди.
