Ўзбекистонда мудофаа ишлар органларида фаолият юритаётган фуқаро ходимларнинг иш ҳақи миқдори икки босқичда оширилади. Бу ҳақда Мудофаа вазири Шуҳрат Холмуҳаммедов маълум қилди.
Унинг айтишича, жорий йилнинг 1 июлидан мазкур тоифадаги ходимларнинг иш ҳақи 20 фоизга оширилади. Шунингдек, 2027 йилнинг 1 январидан бошлаб уларнинг маошига яна 50 фоиз қўшилади.
Мазкур маълумот Президент Шавкат Мирзиёевнинг мудофаа соҳасидаги айрим масалаларга бағишланган тақдимот билан танишуви якунлари бўйича маълум қилинди.
Шу билан бирга, Тошкент ва Самарқанд шаҳарларида хизмат ўтаётган ҳарбий хизматчилар учун тураржой ижарасига тўланадиган пул компенсацияси ҳам 25 фоизга оширилиши белгиланган.
Тақдимот давомида давлат раҳбари қўшинларнинг жанговар шайлиги ва тайёргарлигини янада ошириш, ҳарбий соҳада илғор тажрибаларни кенг жорий этиш бўйича устувор вазифаларни белгилаб берди.
Шунингдек, ҳарбий таълим тизимини такомиллаштириш, аскарларни касбга ўқитиш ва олий таълим муассасаларига тайёрлаш, улар учун муносиб шарт-шароитлар яратиш юзасидан масъулларга тегишли топшириқлар берилди.
