Тошкентда Жасжан номи билан танилган блогер Instagram’га видео олиш учун Москва метросида номақбул” ҳаракат қилди. Бу ҳақда “Korotko.uz” маълум қилди.
Билдиришича, блогер Россия пойтахти Москва шаҳрида метрополитенда провокацион контент тайёрлаб, йўловчилар билан сунъий можаролар келтириб чиқарган. Сўнг у полиция томонидан қўлга олинган.
Блогер Россиядан чиқиб кетиш арафасида аэропортда тўхтатилган. Тергов жараёнида у Москвага айнан шундай видеолар суратга олиш мақсадида келганини тан олган.
Тарқалган видеоларда блогер метрополитен йўловчиларини атайлаб ғазаблантиришга ва турли баҳсли вазиятларни юзага келтиришга урингани кўринган.
Ҳуқуқни муҳофаза қилувчи органлар билан суҳбат давомида у қилган ишларидан пушаймон эканини билдириб, жамоатчиликдан узр сўраган.
Ҳозирча блогерга нисбатан қандай ҳуқуқий чора қўлланиши ҳақида расмий маълумот берилмаган.
Аввалроқ, у Тошкент шаҳрида ижтимоий тармоқларга видео олиш мақсадида ўзаро жанжал уюштириб, жамоат тартибини бузиб жавобгарликка тортилган эди.
