Жорий йилнинг март ойи иқлимий меёрга яқин бўлди. У ҳароратнинг кескин ўзгариб туриши ва ёғингарчилик нотекис бўлиши билан тавсифланди. Бу ҳақида "Ўзгидромет" маълумот берди.
Март ойининг биринчи беш кунлиги ўртача меъёрдан 5-7 даражага паст бўлиб, ҳаво жуда совуқ бўлиши кузатилди. Энг совуқ кечаларда (3-4 март) ҳудуднинг катта қисмида ҳаво ҳарорати 3-8 даража совуққача, шимолда 12-17 даража совуққача (Устюртда 23-24даража совуққача) пасайди.
Март ойи биринчи ўн кунлигининг охирига келиб, ҳаво ҳарорати кўтарила бошлади ва учинчи ўн кунликнинг ўрталаригача Ўзбекистон ҳудудининг катта қисмида жуда илиқ об-ҳаво кузатилди. Ҳарорат фони меъёрдан 2-7 даражага, айрим кунларда 8-11 даражага, шимолда эса 12-15 даражага кўп бўлди.
Энг иссиқ кунларда ҳаво 25-30даражагача, жанубда 31-35даражагача исиди, бу март ойидаги максимал ҳаво ҳароратининг мутлақ қийматларига яқин бўлди.
Учинчи ўн кунликнинг ўрталарида Ўзбекистон ҳудудига Россиянинг Европа ҳудудларидан совуқ ҳаво кириб келди ва ҳаво ҳарорати меъёрдан яна 3-6 даражага пасайди. Қорақалпоғистон Республикасининг айрим жойларида ҳарорат кечалари бироз совуққача пасайди.
Март ойи нисбатан иссиқ бўлиб, ўртача ойлик ҳаво ҳарорати меъёрдан 1-2 даражага кўп бўлди.
1 март куни Қорақалпоғистон Республикаси ва Хоразм вилоятида, 2-3 март кунлари республика ҳудудининг катта қисмида асосан қор кўринишидаги ёғингарчилик кузатилди. Текислик ҳудудлари бўйича (Фарғона водийси вилоятларидан ташқари) баландлиги 3 см дан 13 см гача бўлган қор қоплами ҳосил бўлди. Қор қоплами текислик ҳудудларда 1-2 кун, Қорақалпоғистон Республикасида 4-6 кун давомида сақланиб турди.
Март ойи ва айниқса ойнинг боши учун қор қопламининг қисқа муддатга шаклланиши - бу деярли одатий ҳолдир.
7-8 март кунлари республика бўйича ёмғир ёғди, тоғларда қор ёғди, кейинчалик Ўзбекистонда узоқ давр давомида асосан қуруқ об-ҳаво қайд этилди. Март ойи учинчи ўн кунлигининг бошида яна ёмғир ёғиши бошланди. Бунда ўрта тропосферада юқори антициклон ҳосил бўлиб, у Ўзбекистон ҳудуди устида бир неча кун давомида нам ҳаво циркуляциясини сақлаб турди.
22-23 март кунлари шимоли-ғарбий ҳудудларда, 24-27 март кунлари республика ҳудудининг катта қисмида, 28март куни шарқий ҳудудларда вақти-вақти билан ёмғир ёғди, баъзи жойларда кучли бўлди. Айрим ҳудудларда биринчи баҳорий момақалдироқлар қайд этилди.
Ойлик ёғин миқдорининг катта қисми шу даврга тўғри келди.
Республика ҳудудининг катта қисмида март ойи учун ёғингарчиликнинг умумий миқдори ойлик меъёр атрофида ва ундан кам бўлди. Март ойида энг қуруқ ҳудудлар Бухоро вилояти ва Навоий вилоятининг жанубий қисми бўлиб, бу ерда ёғингарчилик ой давомида меъёрдан 40% дан кам бўлди.
Фақат Қорақалпоғистон Республикаси, Хоразм, Сурхондарё вилоятларида ёғингарчилик ойлик меъёрдан 1,2-1,7 баробар кўп бўлди.
Республиканинг тоғли ҳудудларида март ойида қорнинг жадал эриши кузатилди. Ой охирига қор қоплами фақат Тошкент вилоятининг баланд тоғли ҳудудларида сақланиб турди, аммо у ерда ҳам қор баландлиги ўртача кўп йиллик кўрсаткичларга нисбатан кам бўлди.
