Арманистон парламентида ҳокимият ва мухолифат вакиллари ўртасида муштлашув юз берди.
Арманистон парламентида ҳокимиятдаги “Фуқаролик шартномаси” фракцияси ва мухолифатдаги “Арманистон” фракцияси депутатлари ўртасида можаро юз берди. Жанжал сабаби – бир депутатнинг арман геноцидини инкор этиш учун жиноий жавобгарликни жорий этиш таклифи бўлди.
Ҳодисадан олдин парламент спикери Ален Симонян мухолифат вакили бўлган “Дашнакцутюн” партияси аъзоларига нисбатан танқидий фикрлар билдирган эди. Ушбу партия “Арманистон” фракцияси таркибига киради. Бунга жавобан “Дашнакцутюн” вакили Арцвик Минасян фракциянинг арман геноцидини инкор этиш учун жиноий жавобгарликни назарда тутувчи қонун лойиҳасини тақдим этиш нияти борлигини маълум қилган.
Спикер Ален Симонян 20 дақиқалик танаффус эълон қилди. Ҳозирги пайтда мажлис залида вазият тинч.
Жорий йил март ойида Арманистон бош вазири Никол Пашинян ташқи ишлар вазири Арарат Мирзояннинг аввал айтган гапини тасдиқлаб, арман геноцидини халқаро миқёсда тан олдириш Ереваннинг ташқи сиёсий устувор йўналишларидан бири эмаслигини маълум қилган.
2024 йил 24 январ куни Цюрихда Швейцариядаги арман жамоатчилиги вакиллари билан учрашув чоғида Пашинян арман геноциди тарихи масаласига яна қайтиш, нима содир бўлгани ва нега содир бўлганини, арманлар буни қандай қабул қилганини ва бу фожиа ким ёрдамида рўй берганини тушуниш кераклигини айтган. Шунингдек, у 1939 йилда геноцид мавзуси кун тартибида бўлмагани, 1950 йилда эса нега тўсатдан пайдо бўлганини тушунмаслигини айтган. Аввалроқ Пашинян арман геноциди мавзусининг кўтарилиши Туркия аъзо бўлган НАТО ва Совет Иттифоқи ўртасидаги геосиёсий кураш билан боғлиқ эканини билдирган эди.
Абдуллоҳ Саййид
