2024 йил 31 июль куни Ўзбекистоннинг “Шоҳпахта” конида маҳсулот тақсимоти тўғрисидаги битим муддати якунлангани учун Россиянинг “Газпром” компанияси кондаги фаолиятини тугатган. Ҳозирда операцион компанияни тугатиш жараёнлари тасдиқланган режалар асосида ва амалдаги қонунчиликка мувофиқ олиб борилмоқда. Бу ҳақда “Газпром Зарубежнефтегаз”га таяниб, “Neftegaz.ru” хабар берди.
“Шоҳпахта” кони Қорақалпоғистон Республикасининг Қўнғирот туманида, Устюрт платосининг жануби-шарқий қисмида жойлашган. Ушбу кон 1962 йилда очилган. Газ захиралари юра ва триас геологик қатламларига мансуб. Коннинг дастлабки газ захиралари 39,9 миллиард куб метрни ташкил қилган, ҳозирги вақтда қазиб олинадиган табиий газ захиралари тахминан 8 миллиард куб метрдан иборат. “Шоҳпахта”да саноат миқёсида газ қазиб олиш 1974 йилда бошланиб, йилига 2,5 миллиард куб метр газ қазиб чиқарилган. Конда жами 7 та газли қатлам мавжуд бўлиб, лойиҳа ана шу қолган захираларни самарали қайта ишлаб чиқишга йўналтирилган.
2004 йилда “Газпром Зарубежнефтегаз” (ҳозирги “Gazprom EP International Limited”) ва “Ўзбекнефтгаз” компанияларидан иборат консорциум “Шоҳпахта” конини реконструкция қилиш ва қайта ишлаб чиқиш бўйича битим имзолаган. Битим муддати 15 йил деб белгиланган. 2018 йил май ойида Санкт-Петербург халқаро иқтисодий форуми доирасида битим муддати 2024 йилгача узайтирилган ва шартлар ўзгартирилмаган ҳолда қолдирилган.
2009 йил июнь ойида “Шоҳпахта” блокида янги Жел кони топилган. Бу коннинг тасдиқланган захиралари 6,4 миллиард куб метр газ ва 76 минг тонна газ конденсатини ташкил қилади. Жел кони бўйича битим 2018 йил октябрда “Gazprom EP International Limited” ва Ўзбекистон Энергетика вазирлиги томонидан имзоланган. Жел конининг ишга туширилиши 2026 йилга мўлжалланган.
“Газпром” ўзининг “Gas Project Development Central Asia” шўба корхонаси орқали Ўзбекистондаги яна бир лойиҳа – “Ўзбекистон Мустақиллиги” инвестиция блокида иштирок этмоқда. Бу лойиҳа “Мустақилликнинг 25 йиллиги” (М-25) деб номланган конни қайта разведка қилиш ва ишлаб чиқишга қаратилган”, дейилади хабарда.
