Собиқ президент Мун Чжэ Ин порахўрликда айбланиб, жиноят иши очилди.
Корея Республикаси прокуратураси бугун маълум қилишича, Жанубий Кореянинг собиқ президенти Мун Чжэ Инга унинг собиқ куёвига авиакомпанияда иш жойини таъминлашга кўмаклашгани билан боғлиқ пора олиш иши бўйича расман айблов эълон қилинди. The Korea Times нашри шу ҳақда хабар берган.
Жанубий Кореяга 2017 йилдан 2022 йилгача президентлик қилган Мун коррупцияда айбланмоқда. Шу билан бирга, арзон авиакомпаниялардан бири — Thai Eastar Jet'га асос солган собиқ депутат Ли Сан Чжик ҳам пора олиш ва ваколатларни суиистеъмол қилиш моддалари билан айбланди.
Мун ва унинг қизи Да Хе авиакомпания томонидан Да Хенинг собиқ турмуш ўртоғи, фамилияси Сео бўлган шахсга маош ва бошқа тўловлар орқали пора олганликда гумон қилинмоқда.
2018 йилда авиакомпания асосчиси Ли, Корея кичик ва ўрта бизнес ҳамда стартаплар агентлиги раҳбари этиб тайинланганидан сўнг, Сео Thai Eastar Jet авиакомпаниясида ижроия директори этиб тайинланган.
Терговчиларнинг фикрича, Лининг юқори лавозимга тайинланиши Сео’ни авиакомпанияга ишга қабул қилишга алмашинув сифатида амалга оширилган. Лекин ўша пайтда Сео авиация соҳасида ҳеч қандай тажрибага эга эмас эди.
Айбловга кўра, Сео ишга жойлашганидан кейин Мун қизнинг оиласига молиявий ёрдам кўрсатишни тўхтатган. Прокуратура авиакомпания томонидан Сео ва Да Хега тўланган тахминан 223 миллион вон (151 959 доллар) миқдоридаги маош ва компенсацияни собиқ президентга берилган пора деб баҳоламоқда.
Эслатиш жоиз, Мун Чжэ Ин 2017–2022 йилларда Жанубий Корея президенти бўлган ва Шимолий Корея етакчиси Ким Чен Ин билан тинчлик сулҳини имзолагани билан тарихда қолган.
Мун Чжэ Иннинг айблари тасдиқланса, сиёсий фаолияти шармандаларча якунланган Жанубий Корея президентлари рўйхатидан жой олади. Шу йил апрель ойида Жанубий Кореянинг собиқ президенти Юн Сок Ёл ҳам ноқонуний ҳарбий ҳолат эълон қилиш ва исёнга ундаш айбловлари бўйича лавозимидан озод этилиб, унга жиноят иши очилган эди.
Айни пайтда Жанубий Кореяда президент вазифасини бош вазир Хан Дук Со бажармоқда.
Абдуллоҳ Саййид
