Эрон депутати Исроилни портлашда алоқадорликда айблади, ёнғинлар ҳануз давом этмоқда.
Эроннинг Бандари Аббос портида содир бўлган кучли портлаш оқибатида ҳалок бўлганлар сони камида 40 нафарга етгани, жароҳатланганлар эса 1000 нафардан ошгани хабар қилинди. Портлаш сабаблари ҳали аниқланмаган бўлса-да, Эрон парламенти аъзоси Муҳаммад Сирож бу фожиада Исроилни айблаб, контейнерларга портловчи моддалар жойлаштирилганини иддао қилди.
The Times of Israel нашрининг ёзишича, депутат мазкур даъволарини исботлайдиган далиллар келтирмаган.
Сирожнинг айтишича, портловчи моддалар юк манбасида ёки ташиш йўлида контейнерларга жойлаштирилган бўлиши мумкин. Портлаш камида тўртта нуқтада содир бўлган.
Исроил расмийлари бу айбловларни рад этди ва портлашга алоқаси йўқлигини билдирди. Исроил раҳбарияти ҳозирча расман изоҳ бермаган.
Эрон Президенти Масъуд Пезешкиён жароҳатланганларни шифохонада зиёрат қилди ва воқеа жойини айланиб чиқди. Вилоят ҳокими уч кунлик мотам эълон қилди.
Портлаш портининг Шаҳид Ражеи қисмидан бошланган бўлиб, бир неча километр радиусдаги биноларнинг ойналари синган, контейнерлар ва товарлар катта зарар кўрган.
Ҳануз портда ёнғин тўлиқ ўчирилмаган, қутқарувчилар вайрона остида қолган жасадларни излашни давом эттирмоқда.
Порт расмийлари портлаш хавфли кимёвий моддалар сақланган омборхонада бошланган ёнғин оқибатида юзага келган бўлиши мумкинлигини билдиришди. Айрим манбалар портлашни ракета ёнилғисидаги натрий перхлорат моддаси билан боғлади. Аммо Эрон Мудофаа вазирлиги бу маълумотларни рад этди ва ҳарбий юк сақланганини инкор этди. Шундай бўлсада, портлаш пайтида кўтарилган қизғиш тусли тутун портлашда кимёвий моддалар иштирок этганини кўрсатган бўлиши мумкинлиги таъкидланди. Бу ҳолат 2020 йилдаги Бейрут портлашини эслатади.
Абдуллоҳ Саййид
