Politico ёзишича, Дональд Трамп маъмурияти Мадуро учун Россия, Туркия ёки Кубага бориши мумкин бўлган сургун вариантларини кўриб чиқмоқда. Оқ уйдаги манбалар Мадурога Россияга кетиш учун “яшил чироқ” берилиши эҳтимолини билдирган.
The Atlantic манбаларига кўра, Мадуро АҚШ ва Венесуэла вакиллари билан музокараларда амнистия, уни топганлар учун мукофотнинг бекор қилиниши ва хавфсиз сургун кафолатланса, истеъфога тайёрлигини айтган. Бунгача Трамп Мадуро билан музокара ўтказишга тайёрлигини билдирган, аммо учрашув вақти очиқланмаган.
Бу орада АҚШ Мудофаа вазири Пит Ҳегсет “Southern Spear” деб номланган ҳарбий операция бошланганини маълум қилди. USS Gerald R. Ford авиаташувчи кемаси бошчилигидаги йирик зарба гуруҳи Қариб денгизига киргани айтилмоқда. Кема бортида 4 мингдан зиёд ҳарбий хизматчи ва жанговар учиш аппаратлари жойлашган.
Мадуро эса оммага мурожаат қилиб, Трампни можарони авж олдирмасликка чақирган. Reuters маълумотига кўра, ўтган ҳафта Оқ уйда Венесуэлага нисбатан эҳтимолий ҳарбий зарбалар муҳокама қилинган.
Маълумот учун, агар Мадуро Россияга борадиган бўлса, у Москвадан бошпана топган собиқ раҳбарлар — Виктор Янукович ва Башар Асад қаторига қўшилади.
АҚШ билан таранглик кучайишидан олдин эса Мадуро Путиннинг туғилган кунида Россия билан стратегик ҳамкорлик шартномасини имзолаганди.
