Мамлакатимизнинг биринчи рақамли теннисчиси Сабина Шарипова Халқаро теннис федерацияси томонидан Бирлашган Араб Амирликларида ўтказилаётган хотин-қизлар ўртасидаги турнирда чорак финалга чиқди. Бу ҳақда ЎзА хабар бермоқда.
Турнирнинг биринчи даврасида Сабина Шарипова хорватиялик Жана Феттни 7:5, 6:3, яна бир теннисчимиз Нигина Абдураимова эса люксембурглик Мэнди Минеллани 6:1, 7:5 ҳисобида мағлубиятга учратди.
Қуръа натижасига кўра, мусобақанинг иккинчи даврасида Сабина ва Нигина ўзаро куч синашди. Кескин ва муросасиз ўтган баҳсда С.Шарипованинг қўли баланд келди ва чорак финалда недерландиялик Леслей Керкхове билан рақобатлашадиган бўлди.
Шунингдек, Сабина Шарипова турнирнинг жуфтлик баҳсларида украиналик Анастасия Васильева билан биргаликда руминиялик Кристина Дину ва словениялик Тадея Майерични 6:4, 6:1 ҳисобида енгди.
Сабина ва Анастасия ярим финал йўлланмасини қўлга киритиш учун россиялик теннисчилар Натела Дзаламидзе ва Вероника Кудерметова билан баҳслашади.
