Қозоғистон Президенти Қосим-Жомарт Тўқаев 29 август — Халқаро ядровий синовларга қарши кураш куни муносабати билан ижтимоий тармоқларда баёнот берди.
Унга кўра, Қозоғистон халқи ядро синовларининг энг оғир оқибатларини бошдан кечирган ва бундай фожиа бошқа ҳеч қаерда такрорланмаслиги лозим.
“Бу сана БМТ томонидан айнан Қозоғистон ташаббуси билан белгиланган. Биз келажак авлодлар учун ядровий синовлардан бутунлай воз кечишимиз, тинчлик ва хавфсизликни мустаҳкамлашимиз керак”, — дейди президент.
1949–1989 йилларда Қозоғистондаги “Семипалатинск” ядровий полигонида СССР томонидан 450 дан ортиқ ерусти ва ерости ядровий портлашлар ўтказилган. Натижада катта ҳудуд радиацион ифлосланишга учраган, юз минглаб одамлар саломатлигига жиддий зарар етган.
1991 йил 29 августда полигон расман ёпилган. Қозоғистон эса ядровий қуролдан ихтиёрий равишда воз кечган илк давлатлардан бири бўлди.
Сўнгги йилларда синовлардан зарар кўрган аҳолини қўшимча ижтимоий ҳимоя қилиш масаласи кўп бора кўтарилган. Хусусан, 2023 йилда депутатлар бу тоифадаги фуқароларга муддатидан олдин нафақага чиқиш имконини беришни таклиф қилган.
Таклифга кўра, эркаклар 25 йиллик стаж билан 55 ёшда, аёллар эса 20 йиллик стаж билан 50 ёшда нафақага чиқиши мумкин.
