Ўтган йилларда соғлиқни сақлаш соҳасига ажратилаётган маблағ 6 баробарга ошди. Энди илгари фақат пойтахтда амалга оширилган юқори технологик амалиётлар 400 дан ортиқ ҳудудий марказларда ҳам бажарилмоқда.
Шунингдек, аҳолининг умр кўриш давомийлиги 73,8 ёшдан 75,1 ёшга узайди. Президент, “Таълим, саломатлик, муаллим ва шифокорлар учун қандай куч ва маблағ керак бўлса — барчаси сафарбар этилади”, дея таъкидлади.
Ёшлар – орзуларни рўёбга чиқараётган куч
Ўзбекистон ёшлари спорт ва фан соҳаларида тарихий ютуқларга эришмоқда. Миллий терма жамоа илк бор Жаҳон чемпионатига йўлланма олди, талабаларимиз эса 116 давлат ичида Универсиадада илк бор топ-15 таликка кирди.
Шунингдек, ёш боксчиларимиз Осиё чемпионлигини қўлга киритди. Президент, “Биз соғлом авлод учун Тошкентда Олимпия шаҳарчасини қурдик, илк бор замонавий Футбол академияси ташкил этдик”, деди.
Фан олимпиадаларида порлаган ёшлар — Ўзбекистон фахри
Ёшларимиз бу йил халқаро фан олимпиадаларида 15 та медални қўлга киритди. Улар МДҲ мамлакатлари орасида кимё бўйича 2-ўрин, математика ва иқтисодда 3-ўрин, IT ва географияда 4-ўринни эгаллади.
Президент ёшларни “бўлажак Хоразмий, Беруний, Ибн Сино” дея таърифлаб, “Бах — интилувчига, ғалаба — курашчига насиб этади. Тарихни фақат ғолиблар яратади”, дея мурожаат қилди.
Ўзбекистон “рақамли ва адолатли судлар” даврига қадам қўймоқда
Суд ишлари тўлиқ рақамлаштирилмоқда, инсон омили камайтирилиб, сунъий интеллект жорий этилмоқда. Энди тарафлар судга бориб ўтиришига ҳожат йўқ — жараёнлар онлайн ўтади.
Сўнгги уч йилда судланганларнинг 70 фоизига озодликдан маҳрум қилинмайдиган жазо қўлланилган, 3 мингга яқин фуқаро оқланган, 3 мингдан ортиқ маҳкум афв этилган. Президент бу ислоҳотлар “вақтинчалик кампания эмас, балки давлат сиёсатидир”, дея таъкидлади.
