Қозоғистоннинг Оқмўла вилоятида банк ходимларидан иборат уюшган жиноий гуруҳга нисбатан тергов якунланди. Улар аҳолининг ижтимоий ҳимояга муҳтож қатламларидан одам ўғирлаб, уларнинг номига катта миқдорда кредитлар расмийлаштирган. Бу ҳақда 2 сентябр куни вилоят прокуратураси маълум қилди.
Маълум қилинишича, уюшган жиноий гуруҳ мамлакатнинг турли ҳудудларидан келган 25 кишидан иборат эди. Улар қатор банклар («Каспи Банк», «Форте Банк», «Евросиё банки», «Жусан банк») ходимлари бўлиб, 5 йилдан ортиқ вақт давомида фирибгарлик ҳаракатларини содир этган.
Таъкидланишича, Қозоғистоннинг 348 нафар фуқароси жиноят қурбони бўлган, етказилган зарар 3,7 миллиард тенгени (6,8 миллион доллар) ташкил этган.
Тергов жиноий пул эвазига сотиб олинган мол-мулк - Олмаотадаги квартиралар ва ер участкалари, қимматбаҳо автомобиллар, катта миқдордаги нақд пулларни аниқлади. Олиб қўйилган нарсаларнинг умумий қиймати 2,7 миллиард тенгени (тахминан 5 миллион доллар) ташкил этди.
Гуруҳнинг барча аъзолари қўлга олиниб, вақтинча сақлаш ҳибсхонасига жойлаштирилган. Ишнинг бошқа тафсилотлари ошкор этилмади.
Кенг кўламли текширувлар Зеренди тумани аҳолисининг шикоятларидан сўнг бошланган. Одамлар - асосан, нафақахўрлар ва камбағаллар – ўз номига кредитлар ноқонуний расмийлаштирилганини айтган. Туман прокурори текширув ташаббуси билан чиққанидан сўнг, 2024 йил ноябр ойида жиноят иши қўзғатилган эди.
