Шимолий Корея раҳбари Ким Чен Ин Россия Президенти Владимир Путин билан Хитой пойтахти Пекинда ўтказган учрашувдан сўнг фавқулодда хавфсизлик чораларини кўрди. Бу ҳақда Zamon.uz нашри маълум қилди.
Қайд этилишича, икки соатлик музокаралардан кейин Шимолий Корея делегацияси ўз раҳбарининг ҳар қандай биологик изларини қолдирмаслик учун барча эҳтиёт чоралари қўллаган.
Хусусан, учрашув давомида Ким Чен Ин фойдаланилган стакан, кресло, стол ва бошқа мебель буюмлари, ҳаттоки, ҳаво орқали етиши мумкин бўлган заррачалар ҳам махсус хизматлар томонидан йиғиштириб олинган ва дезинфекция қилинган.
Таҳлилчилар фикрича, бундай кескин хавфсизлик протоколи хорижий разведка хизматларининг КХДР етакчисининг соғлиғи ёки генетик ҳолати ҳақида маълумот тўплашининг олдини олишга қаратилган.
Бу каби усуллар аввалги раҳбар — Ким Чен Ир даврида ҳам кенг қўлланилган. Уларнинг асосий мақсади — ҳар қандай биологик излар, жумладан соч толалари, тери заррачалари ёки чиқиндилар орқали КХДР етакчисига оид махфий тиббий маълумотлар олинмаслигидир.
Шунингдек, манбаларга кўра, Шимолий Корея делегацияси хорижий сафарларда кўчма ҳожатхона, ёпиқ чиқинди идишлари ва ҳаракатланадиган дезинфекция тизимларини ҳам олиб юради. Бу эса Ким Чен Ин хавфсизлиги ва шахсий махфийлигини таъминлашнинг энг юқори даражада амалга оширилаётганини кўрсатади.
