Буюк Британия пойтахти Лондон шаҳрида “Palestine Action”
ташкилотининг тақиқланишига қарши ўтказилган йирик намойиш кутилмаган тус олди. Бу ҳақда BBC news маълум қилди.
Қайд этилишича, акцияда 890 киши ҳибсга олинган. Ҳибсга олинганларнинг асосий қисми терроризмга оид қонунга биноан — тақиқланган гуруҳни қўллаб-қувватлагани учун ушланган. Яна 17 нафар иштирокчи полициячиларга ҳужум қилганликда айбланмоқда.
Намойишчилар эса фақат тинчлик учун курашаётганини билдириб полицияни ёлғон хабар тарқатишда айблаган. Уларнинг қўлида “Мен геноцидга қаршиман, Palestine Аcтионни қўллайман” деган плакатлар бўлган.
Маълумот учун, “Palestine Action” июль ойида РАФ ҳарбий базасига бостириб кириб, самолётларга зарар етказганидан кейин террорчи ташкилот сифатида тақиқланган. Эндиликда ушбу гуруҳни қўллаб-қувватлаш 14 йилгача қамоқ жазоси билан жазоланади.
Буюк Британия ички ишлар вазири Шабана Маҳмуд эса “Фаластинни қўллаб-қувватлаш ва террорчи гуруҳни қўллаш мутлақо бошқа нарсалар”, дея кескин баёнот берди.
