Қуддусда отишма содир бўлди. Ҳодиса Рамот йўлининг ажралишидаги автобус бекатларидан бирида содир бўлган. Бу ҳақда Zamon.uz нашри хабар берди.
Маълум қилинишича, 6 киши ҳалок бўлган ва камида 10 нафар инсон яраланган. Полиция маълумотига кўра, икки ҳужумчи 62-йўналишдаги автобусга ва унинг ёнида бўлган одамларга қарата ўқ узган. Исроил Мудофаа армияси аскари ва қуролланган фуқаро уларга жавоб ўқи билан ҳужумчиларнинг иккаласини ҳам отиб ташлаган.
Маген Давид Адом тез ёрдам хизматининг хабарида ёзилишича, жароҳатланганлар Шаарей Тседек ва Ҳадасса шифохоналарига олиб борилган. Ярадорларга зудлик билан қон қуйиш зарур бўлгани учун Марказий банкдан қон захиралари жўнатилган.
Ҳужум уюштирганлар Шарқий Қуддусда яшовчи фаластинликлар бўлгани айтилмоқда. Улар Швециянинг Carl Gustaf m/45 автоматининг қўлбола нусхасидан фойдаланган. Бундай турдаги қуроллар фаластинликлар орасида кенг тарқалган.
Исроил бош вазири Бинямин Нетаняху ҳужумга кескин жавоб берилишини билдирди. Миллий хавфсизлик вазири Итамар Бен-Гвир Қуддус ва Ғарбий Соҳилда хавфсизлик чораларини кучайтиришга чақирди.
ҲАМАС Қуддусдаги ҳужумни Исроилнинг босқинчиликлари учун жавоб деб атади. Бироқ улар жавобгарликни ўз зиммасига олмаган. Фаластин томони эса ҳужум юзасидан расмий изоҳ бермаган.
