Жорий йилнинг 16 сентябрь куни Россиянинг Санкт-Петербург шаҳрида 23 ёшли ўзбекистонлик ишчи қурилиш майдонида ҳалок бўлди. Бу ҳақда Россиянинг Шимоли-ғарбий минтақалараро меҳнат инспекцияси матбуот хизмати хабар берди.
Билдирилишича, Добролюбов проспектида Россия Олий суди ва Олий суд ҳузуридаги cуд департаменти биносини қуриш жараёнида 23 ёшли ўзбекистонлик ишчи қурилиш “леса”да ишлаётганда 15 метр баландликдан қулаб тушиб, воқеа жойида вафот этган. Аниқланишича, ҳалок бўлган ишчи ва қурилиш компанияси ўртасида расмий меҳнат ҳужжатлари мавжуд бўлмаган.
Шимоли-ғарбий минтақалараро меҳнат инспекцияси раҳбари ўринбосари Олга Казанскаянинг сўзларига кўра, ҳодисанинг эҳтимолий сабаблари ишчининг шахсий ҳимоя воситаларидан фойдаланмагани, жамоавий ҳимоя воситаларининг йўқлиги ва баландликда ишларни қониқарсиз ташкил этиш бўлган.
