Канада бош вазири Марк Карнининг таъкидлашича, мамлакат Фаластин давлатини тан олиб, унинг тинч келажак қуриш йўлида ҳамкорликка тайёрлигини билдирди, дея ёзмоқда ББС.
Шундан сўнг Австралия бош вазири Энтони Албанезе ҳам ўз мамлакати Фаластинни мустақил давлат сифатида тан олганини эълон қилди. Унинг сўзларига кўра, бу Канада ва Буюк Британия билан ҳамкорликда икки давлатли ечимни таъминлашга қаратилган халқаро ҳаракатнинг бир қисми ҳисобланади.
Кечроқ Буюк Британия бош вазири Кир Стармер ҳам Фаластин давлатини тан олиш вақти келганини айтди. Унинг таъкидлашича, бу қарор тинчлик ва икки давлатли ечим имкониятини сақлаб қолиш, шунингдек, Исроил ва Фаластин халқлари учун яхшироқ келажакни таъминлашга хизмат қилади.
Стармер Ғазода юз берган инсонпарварлик инқирозини кескин қоралаб, чегаралардаги чекловларни бекор қилишга ва гуманитар ёрдам киришига йўл очишга чақирди. Шу билан бирга, у бу қарор Ҳамас учун мукофот эмаслигини, балки унинг ҳукумат ва хавфсизликда мутлақо роли бўлмаслигини таъкидлади.
Шу тариқа, Канада, Австралия ва Буюк Британия Фаластин давлатини тан олган 150 дан ортиқ мамлакатлар қаторига қўшилди.
