Экология вазирлиги огоҳлантиришича, пойтахтда ҳавонинг ифлосланиши кейинги кунларда кучайиши мумкин. Бунга Навоийнинг шарқий қисми ва Қозоғистон жанубидан эсган шамоллар сабаб бўлди.
22 сентябрь куни Тошкент ҳавонинг ифлосланиши бўйича дунёда биринчи ўринга чиқди. Соат 17:15 да AQ 556 кўрсаткичини қайд этди, бу эса “хавфли” даражани англатади. Кейинги куни туш пайтига келиб, индекс 135 га пасайди.
Вазирликка кўра, кучли шамоллар Қизилқум ва Айдаркўл атрофидан кўтарилган чангни пойтахт томон олиб келган. Натижада шаҳарда PM2.5 миқдори меъёрдан 4–5 баравар юқори қайд этилди. Мутахассислар 23–24 сентябрь кунлари эрталаб ва кечқурун кўрсаткичлар яна ошиши мумкинлигини таъкидламоқда.
Фақат 24 сентябрь кечаси, янги циклон кириб келиши билан, ҳаво тезда тозаланиши кутилмоқда.
