Япония бугун, 24 сентябрь куни мактабларда дарсликлардан фақат рақамли шаклда фойдаланишга рухсат беришга қарор қилди, ҳукумат бу босқични 2030 молиявий йилдан бошлаб давлат бошланғич мактабларида жорий этмоқчи. Бу ҳақда “Kyodo News” хабар берди.
Маълум қилинишича, таълим вазирлиги ишчи гуруҳи томонидан тасдиқланган ўзгартириш маҳаллий таълим кенгашларига фақат рақамли дарсликларни қабул қилиш, уларни қоғозлар билан бир қаторда қўллаш ёки фақат қоғоз дарсликларга “ёпишиб олиш” имкониятларини беради.
Таълим бўйича Марказий Кенгашнинг таъкидлашича, бу ҳаракат дарсликларни кенгроқ танлашга олиб келади, жамиятнинг тобора рақамли табиатига мос келадиган ўрганишни осонлаштиради ва янги, ижодий ўқитиш усулларини яратади. Бироқ айрим экспертлар рақамли дарсликлардан фойдаланиш ўқитувчилар ва дарслик нашриётчилари зиммасига юкни ошириб, ўқувчиларнинг кўриш қобилияти ва бошқа соғлиқ муаммоларини келтириб чиқариши мумкинлигидан хавотир билдирди.
Таълим, маданият, спорт, фан ва технологиялар вазирлиги 2026 йилги навбатдаги Диэт сессиясида тегишли қонунларга ўзгартиришлар киритиш бўйича қонун лойиҳаларини тақдим этишни мақсад қилган.
Рақамли дарсликлар Японияда аллақачон қўлланмоқда, бироқ “муқобил ўқув қўлланмалари” сифатида алоҳида ҳукумат рухсатини талаб қилмайди, чунки улар аллақачон қоғоз дарсликларнинг нусхаларига айланиб, овоз чиқариб ўқиш функциялари билан жиҳозланган.
Янги тизимга кўра, дарсликлардаги QR-кодлар орқали фойдаланиш мумкин бўлган рақамли дарсликлар ва ўқув қўлланмалари янгидан саралашдан ўтказилади, чунки ишчи гуруҳ контент сифатини таъминлашга ҳаракат қилади. Вазирлик синфларда рақамли материаллардан фойдаланиш бўйича кўрсатмалар яратиши кутилмоқда, чунки гуруҳ ҳар бир фаннинг ўзига хос хусусиятларини ва ўқувчиларнинг ривожланиш босқичини ҳисобга олишни зарур, деб топди.
