Ўзбекистоннинг биринчи мудофаа вазири, истеъфодаги генерал-полковник Рустам Ўрмонович Аҳмедов ҳаётдан кўз юмди. Бу ҳақда Мудофаа вазирлиги матбуот хизмати хабар берди.
Рустам Ўрмонович 1943 йил 10 ноябрда Фарғона вилоятининг Боғдод туманида туғилган. Генерал-полковник 40 йилдан ошиқ вақт давомида Қуролли Кучлар тизимида ишлаган.
У 1966 йилдан 1972 йилгача Болтиқбўйи қўшинлари ҳарбий округи 11-армия танк полки танк взводи командири лавозимидан Шимолий қўшинлар танкчилар баталёни командирининг сиёсий бўлим бўйича ўринбосари лавозимларида хизмат қилган.
1972 йилдан 1986 йилгача Тошкент олий танк қўмондонлик, Самарқанд олий ҳарбий автомобил қўмондонлик-муҳандислик билим юртларида курсантлар баталёнида командирнинг тарбиявий ишлар бўйича ўринбосари ҳамда баталён командири лавозимларида хизмат қилган.
1986 йилдан 1991 йилгача Тошкент вилояти фуқаролик мудофааси командирининг ўринбосари – штаб бошлиғи бўлиб ишлаган.
Марҳум 1991 йилдан 1992 йилгача бир вақтнинг ўзида Ўзбекистон мудофаа ишлари бўйича вазири, Ўзбекистон Миллий гвардия қўмондони, 1992 йилдан 1997 йилгача эса Ўзбекистон Республикаси мудофаа вазири лавозимида фаолият юритган.
Рустам Аҳмедов бир қатор медаллар, II даражали “Шон-шараф” ва “Дўстлик” орденлари билан тақдирланган.
