АҚШнинг собиқ президенти Жо Байден простата бези саратони ташхиси қўйилиб, даволанишни бошлагач, илк бор жамоатчиликка кўриниш берди.
82 ёшли сиёсатчи Делавер штатидаги Авлиё Иосиф черковида кечки ибодатда иштирок этди. ОАВ томонидан эълон қилинган суратларда Байден ёнидагиларга суянган ҳолда кўринади. Унинг ўнг кўзининг устида эса яқинда тери саратонини олиб ташлаш бўйича ўтказилган операциядан қолган чандиқ аниқ кўриниб турибди.
Бу маросим Байден простата саратонининг тўртинчи босқичига қарши беш ҳафталик нурланиш ва гормонал терапия курсини бошлаганидан кейинги биринчи оммавий чиқиш ҳисобланади.
Байденга оғир турдаги саратон ташхис қилинган бўлса-да, шифокорлар у даволанишга ижобий жавоб қайтараётганини билдирган. Ҳозирда у хусусий ҳаёт тарзини олиб бораётган бўлса-да, яқин орада бир нечта тадбирларда иштирок этиши кутилмоқда.
