"Интер Маями" расмий сайтида 38 ёшли ҳужумчи Лионел Месси билан шартнома 2028 йилга қадар узайтирилгани маълум қилинди.
"Мен бу ерда қолиб, ушбу лойиҳа устида ишлашда давом этаётганимдан жуда хурсандман. Бу лойиҳа – "Маями Фридом Парк" стадионида ўйнаш нафақат орзум, балки ажойиб реалликка ҳам айланди. Маямига келганимдан бери жуда бахтиёрман, шунинг учун бу ерда ўйнашда давом этишимдан чин дилдан хурсандман", – деган Месси.
Месси "Интер Маями" сафида 2023 йил ёзидан буён тўп суриб келмоқда. Бу вақт ичида ҳужумчи барча мусобақалар доирасида 82 та ўйинда майдонга тушиб, 71 та гол ва 37 та голли узатмага муаллифлик қилган. Transfermarkt порталида келтирилган маълумотларга кўра, футболчининг бозор нархи 18 млн еврони ташкил этади.
