Ўзбекистон Республикасининг Россия Федерациясида жойлашган консуллик муассасалари фаолияти давомида Ўзбекистон фуқаролари томонидан консуллик муассасаларига қалбаки ҳужжатлар тақдим этиш ҳолатлари кузатилмоқда. Шу сабабли Ўзбекистон Ташқи ишлар вазирлиги ушбу мамлакатдаги ўзбекистонликларга огоҳлантириш билан чиқди.
Мавжуд маълумотларга кўра, Ўзбекистон ва бошқа давлатларнинг турли хил қалбаки ҳужжатларини тайёрлаб бериш “хизматлари”ни таклиф қилувчи эълонлар Telegram мобил иловасидаги виртуал гуруҳ ва каналларда кенг тарқалмоқда.
Ушбу жиноий гуруҳлар фаолияти оқибатида фуқаро Э.М.Р. қалбаки “Ватанга қайтиш гувоҳномаси”ни расмийлаштирган ва Ўзбекистонга чипта олиш жараёнида ҳужжатнинг сохталиги аниқланган. Ўзбекистон Республикаси Қозон шаҳридаги Бош консулхонасининг тезкор ҳаракатлари натижасида фуқаронинг Россия Федерацияси Жиноят кодексининг 322-моддаси (Россия Федерацияси давлат чегарасини ноқонуний кесиб ўтиш) ҳамда 327-моддаси (сохта ҳужжатлар, давлат мукофотлари, штамплар, муҳрлар ёки бланкаларни қалбакилаштириш, тайёрлаш ёки сотиш) да назарда тутилган жиноятларни содир этишининг олди олинган.
Шунингдек, фуқаро О.Б.Б. ушбу йўл билан фуқаро Х.М.А. билан тузилган қалбаки никоҳ асосида “никоҳ тузилганлиги тўғрисидаги гувоҳнома”ни расмийлаштирган ва унга асосан Россия Федерацияси фуқаролик ҳолати далолатномаларини ёзиш органларидан ( ФҲДЁ) ўз фарзанди О.М.Б. га “туғилганлик тўғрисидаги гувоҳнома”ни олган.
“Россия Федерацияси ҳудудида бўлиб турган Ўзбекистон Республикаси фуқароларига ижтимоий тармоқларда тарқатилаётган турли хил “ҳужжат тайёрлаб бериш” ҳақидаги эълонларга алданмаслик, ҳужжатларни расмийлаштиришда фақат Ўзбекистон Республикасининг ваколатли давлат органларига мурожаат қилиш қатъий тавсия этилади. Бу орқали сиз фирибгарлик ва нохуш ҳолатларга тушиб қолишнинг олдини олишингиз мумкин”, дейилади хабарда.
