Бу муҳим воқеа Ўзбекистоннинг Европа Иттифоқининг 27 та аъзо давлати билан бозорга кириш шароити бўйича, жумладан экспорт ва импорт божхона имтиёзлари ҳамда хизматлар соҳасидаги келишувларни ўз ичига олган музокаралар муваффақиятли якунланганини англатади, деб ёзади Бу ҳақда Президентнинг ЖСТ бўйича махсус вакили Азизбек Урунов ўз LinkedIn’даги саҳифасида маълум қилди.
"Икки йилдан ортиқ фаол музокаралар, таҳлиллар ва ҳамкорликдаги иш жараёни мамлакатимиз учун катта натижа берди. Бу жараён садоқат, қатъият ва ҳамжиҳатлик билан амалга оширилиб, ўзаро манфаатли келишувга эришиш имконини берди.
Музокаралардаги қўллаб-қувватлови ва етакчилиги учун Европа Иттифоқи музокара гуруҳига, хусусан, ЕИ Савдо бўйича бош директори Сабина Вейанд, бош музокарачи Тамаш Мачзак, Мари-Пьер Никора ва барча ҳамкасбларга чуқур миннатдорлик изҳор этамиз.
Шунингдек, Ўзбекистон томонидан ушбу жараёнда доимий ёрдам ва рағбат берган Президентимиз, Президент Администрацияси раҳбари, Бош вазир ўринбосари — Идоралараро қўмита раиси ҳамда музокара гуруҳи аъзоларига ҳам самимий миннатдорлик билдирилади.
Европа Иттифоқи Ўзбекистон билан икки томонлама музокараларни якунлаган 31-давлат бўлди. Шунингдек, ўтган ҳафта Панама билан келишув тузилгани ҳақида ҳам маълум қилинган эди.
Энди расман маълум: Ўзбекистон 31 та ЖТТ аъзоси билан музокараларни якунлади, фақатгина учта давлат билан музокаралар қолди," — деб ёзади бош музокарачи.
Ўз ўрнида Европа Иттифоқининг policy.trade.ec.europa.eu сайтида ҳам бу ҳақда хабар берилди.
Ёзилишича, музокаралар доирасида Ўзбекистон товарлар импорти ва экспорти бўйича энг юқори божхона ставкалари ҳамда хизматлар соҳасидаги мажбурият ва имтиёзларини белгилаб берди. Ушбу келишувлар келгусида Ўзбекистоннинг ЖТТга қўшилиш Протоколида акс эттирилади.
Шунингдек, шу куни Европа Иттифоқи ва Ўзбекистон ўзаро манфаатли соҳалар — савдо, инвестиция ва ҳамкорлик йўналишларини қамраб олган Кенгайтирилган шериклик ва ҳамкорлик тўғрисидаги келишувни (EPCA) ҳам имзоладилар.
Бу қадам Европа Иттифоқи ва Ўзбекистон ўртасидаги муносабатларни янада мустаҳкамлайди ҳамда 2025 йил 4 апрель куни бўлиб ўтган “ЕИ — Марказий Осиё” саммитида минтақавий ҳамкорликнинг стратегик даражага кўтарилганини амалда тасдиқлайди.
Маълумотларга кўра, 2024 йил якунига кўра Европа Иттифоқи Ўзбекистоннинг дунё миқёсидаги учинчи йирик савдо ҳамкори (умумий ташқи савдодаги улуши 10,4 фоиз) ва иккинчи йирик экспорт бозори (экспортдаги улуши 7,2 фоиз) ҳисобланади.
