2023 йил августидан 2025 йил майигача бутун дунёда 163 нафар журналист ҳалок бўлган. Бу ҳақда БМТ бош котиби Антониу Гутерриш маълум қилди.
UNESCO мазкур даврда 163 журналистнинг ўлдирилганини қайд этган. Улардан 109 нафари, жумладан, 12 нафар аёл жанговар ҳудудларда ҳалок бўлган. Энг кўп қурбонлар Ғазо секторида (46 киши), Суданда (13 киши) ва Украинада (8 киши) аниқланган.
Журналистларга қарши жиноятлар уруш кечмаётган мамлакатларда ҳам давом этмоқда. Масалан, Мексикада 15 нафар ОАВ ходими ўлдирилган — бу кўрсаткич айрим уруш зоналаридагидан ҳам юқори.
UNESCO маълумотларига кўра, энг кўп журналист қотилликлари араб давлатларида (82 та), Лотин Америкаси ва Қарийб ҳавзасида (34 та), Осиё-Тинч океани минтақасида (30 та), Африкада (5 та) ҳамда Европа ва Шимолий Америкада (12 та) қайд этилган.
Эслатиб ўтамиз, 2 ноябрь — Журналистларга қарши жиноятлар учун жазоланишсизликка барҳам бериш куни сифатида нишонланади. Бу сана 2013 йилда Малида ўлдирилган икки француз журналисти хотирасига бағишланган.
“Чегарасиз мухбирлар” ташкилоти маълумотига кўра, 2023–2025 йиллар оралиғида дунёда камида 1163 журналист ҳибсга олинган, уларнинг 568 нафари ҳозиргача қамоқда сақланмоқда.
