Бугун Президент администрацияси раҳбари Саида Мирзиёева пойтахтдаги экологик вазиятни яхшилаш бўйича кечиктириб бўлмайдиган чора-тадбирларни муҳокама этиш мақсадида йиғилиш ўтказди. Унда Администрация ҳамда тегишли идоралар раҳбарияти иштирок этди.
Йиғилишда сўнгги кунларда кузатилаётган ҳаво ифлосланишининг кескин ошганичуқур ташвиш уйғотаётгани, бу борада тезкор ва мувофиқлаштирилган ҳаракатлар зарурлиги таъкидланди. Масъуллар томонидан атмосфера ҳавосининг жорий ҳолати, аҳолининг мурожаатлари ҳамда жамоатчилик таклифлари юзасидан ҳисоботлар берилди. Ҳаво сифати ёмонлашувига таъсир кўрсатаётган асосий омиллар кенг муҳокама қилинди.
Мажлисда экологик талабларга риоя қилинмаганда ҳавони ифлослантираётган ишлаб чиқаришларга нисбатан қатъий чоралар кўриш лозимлиги алоҳида қайд этилди. Саида Мирзиёева одамлар саломатлиги масаласида муросага ўрин йўқлигини, бу тамойил давлат ҳамда бизнес субъектлари учун бирдек амал қилиши кераклигини таъкидлади.
Йиғилишда экспертлар хулосаларига асосланган тарзда яқин, ўрта ва узоқ муддатли истиқболни ўз ичига олган комплекс таклифлар ишлаб чиқилди. Улар тезкор чоралардан тортиб, келгусида бундай вазиятлар такрорланишининг олдини олувчи тизимли ечимларгача қамраб олади.
Хусусан, экологик назоратни кучайтириш, ифлослантирувчи объектлар фаолиятини чеклаш, қурилиш жараёнларига қўйиладиган талабларни қатъийлаштириш, шаҳарни кенг кўламда кўкаламзорлаштириш ҳамда ҳаво сифатини назорат қилишнинг замонавий тизимини яратиш бўйича вазифалар белгиланди.
Мазкур чора-тадбирлар яқин вақт ичида давлат раҳбарига киритилиши режалаштирилаётган президент фармони лойиҳасининг асосини ташкил этади.
