Ижтимоий тармоқларда метро вагони эшиги очиқ ҳолда ҳаракатлангани акс этган видеолар тарқалганди. Ушбу ҳолат 14 апрель куни соат 12:53 атрофида “Алишер Навоий” бекатида юз берган. Маълум қилинишича, 34-сонли поездда йўловчилар қабул қилингач, машинист томонидан эшикларни ёпиш буйруғи берилган, бироқ учинчи вагоннинг биринчи эшиги тўлиқ ёпилмаган.
Шунга қарамасдан, поезд “Ўзбекистон” бекати томон ҳаракатни давом эттирган. Кейинчалик хавфсизликни таъминлаш мақсадида поезд бекатда тўхтатилиб, барча йўловчилар туширилган ва ҳаракат таркиби техник кўрикка юборилган.
Ҳолат юзасидан хизмат текшируви ўтказилиб, машинистга нисбатан қатъий интизомий чора кўрилиши белгиланган. Метрополитен маъмурияти бундай ҳолатларнинг олдини олиш учун назорат кучайтирилишини маълум қилиб, йўловчилардан узр сўради.
