Сўнгги кунларда ижтимоий тармоқларда ҳавонинг сифатига оид хавотирли маълумотлар кўпайди. Мутахассисларнинг айтишича, PM2.5 ва PM10 заррачалари нафақат катта ёшдагиларга, балки айнан ҳомиладор аёллар организмига икки карра кучли таъсир кўрсатади.
Ҳомиладорлик даврида аёлнинг кислородга эҳтиёжи ортгани сабабли зарарли зарралар ўпкадан қонга тезроқ ўтади ва ҳомилага етиб бориши осонлашади.
Ифлос ҳавонинг ҳомила учун энг хавфли оқибатлари сифатида эрта туғруқ, паст вазн билан туғилиш, плацента фаолиятининг бузилиши, асаб тизими ривожланишидаги ўзгаришлар ва бошқа туғма муаммолар қайд этилмоқда.
Шунингдек, ҳавоси оғир ҳудудларда ҳомиладор аёлларда преэклампсия, юқори қон босими ва иммунитет пасайиши каби хавфлар ҳам ортиши кузатилган.
Шифокорлар бундай шароитда ҳомиладор аёлларга кўчага кам чиқиш, уйда ҳаво тозалагичлардан фойдаланиш, N95 ёки KN95 ниқобларини тақиш ва шифокор кузатувини кучайтиришни тавсия қилмоқда.
