Ўзбекистон Республикаси Президенти Шавкат Мирзиёев ва Қозоғистон Республикаси Президенти Қасим-Жомарт Тоқаев бугун, 24 июнь куни телефон орқали мулоқот қилди.
Суҳбат давомида давлат раҳбарлари Ўзбекистон–Қозоғистон стратегик шериклик ва иттифоқчилик муносабатларини янада мустаҳкамлаш муҳимлигини таъкидлади.
Томонлар икки мамлакат ўртасидаги амалий ҳамкорлик, айниқса, савдо-иқтисодий алоқалар, саноат кооперацияси, энергетика, транспорт, экология, қишлоқ ва сув хўжалиги соҳаларидаги ҳамкорлик юқори суръатларда ривожланаётганини мамнуният билан қайд этди.
Шунингдек, барча даражалардаги фаол мулоқотлар ва ўзаро алмашинувлар алоҳида эътироф этилди. Давлат раҳбарлари икки мамлакат Президентлари администрациялари ўртасида йўлга қўйилган яқин ҳамкорлик эришилган келишувларни ўз вақтида амалга ошириш ҳамда икки томонлама шериклик кун тартибини янги ташаббус ва лойиҳалар билан бойитишга хизмат қилаётганини таъкидлади.
Суҳбат чоғида Ўзбекистон ва Қозоғистон етакчилари минтақавий сиёсатнинг долзарб масалалари юзасидан ҳам фикр алмашди. Шунингдек, яқин вақтда бўлиб ўтадиган икки ва кўп томонлама тадбирлар режаси кўриб чиқилди.
