Францияда Эбола вирусини юқтириш билан боғлиқ биринчи ҳолат расман қайд этилди. Бу ҳақда мамлакат Соғлиқни сақлаш вазирлиги маълумотларига таяниб, Zamon.uz нашри хабар берди.
Маълум қилинишича, хавфли вирус Конго Демократик Республикасида гуманитар миссия таркибида фаолият юритган шифокорда аниқланган. У Францияга қайтгач, таҳлил натижалари тасдиқланишидан олдин ҳам эҳтиёт чораси сифатида юқумли касалликларга ихтисослашган тиббиёт муассасасига жойлаштирилган.
Ҳозирда беморнинг аҳволи барқарор экани айтилмоқда.
Мазкур ҳолат юзасидан Франция соғлиқни сақлаш идоралари томонидан эпидемиологик текширув бошланган. Бемор билан мулоқотда бўлган шахслар аниқланиб, уларга 21 кун давомида тиббий кузатув остида бўлиш ҳамда ўзини ўзи изоляция қилиш тавсия этилган.
Хабарларга кўра, мамлакат Бош вазири Себастьен Лекорню вазиятни шахсий назоратга олган. Франция ҳукумати соғлиқни сақлаш тизими хавфли юқумли касалликларга қарши тезкор ва самарали чоралар кўриш имкониятига эга эканини таъкидлаган.
Эбола вируси юқори ўлим кўрсаткичига эга бўлган геморрагик иситма касаллиги ҳисобланади. Айни пайтда Конго Демократик Республикасининг шарқий ҳудудлари, хусусан Итури вилояти касалликнинг асосий ўчоғи бўлиб қолмоқда.
Расмий маълумотларга кўра, мамлакатда 900 дан ортиқ тасдиқланган ҳолат қайд этилган бўлиб, 200 дан зиёд бемор вафот этган. Касаллик Шимолий Киву ва Жанубий Киву вилоятларига, шунингдек, қўшни Уганда ҳудудига ҳам тарқалган.
Жаҳон соғлиқни сақлаш ташкилоти Эбола тарқалишини халқаро миқёсда ташвиш уйғотувчи соғлиқни сақлаш соҳасидаги фавқулодда вазият сифатида баҳолаб, вазият устидан мониторингни кучайтирган.
