“Reatures”нинг ёзишича, узоқ давом этаётган иқтисодий инқироз Кубада озиқ-овқат, ёқилғи ва дори-дармон танқислигини кучайтирган, бу эса инфекцияга қарши курашни қийинлаштирмоқда. Маблағ ҳамда ёқилғи етишмаслиги дезинфекция ишларини, чиқиндиларни йиғиштиришни ва сув сизиб чиқаётган қувурларни таъмирлашни чеклаб қўймоқда.
Мамлакатда денге иситмаси йиллар давомида муаммо бўлиб келган бўлса, чикунгуня сўнгги ойларда кескин тарқалишни бошлаган. Касалликни Аэдес туркумига мансуб чивинлар юқтиради, улар зика ташувчилари ҳам ҳисобланади. Чикунгуня бош оғриғи, тошмалар ва кучли бўғим оғриқларига сабаб бўлиб, уларнинг баъзилари ойлар давомида давом этади.
Сўнгги ҳафталарда Гавана ва Сантяго шаҳарларида энг юқори касалланиш кузатилган. Ўтган ҳафта 5 717 та янги чикунгуня ҳолати қайд этилган. Расмийлар кўплаб беморлар шифокорга мурожаат қилмаётгани учун ҳақиқий кўрсаткич бундан ҳам юқори бўлиши мумкинлигини таъкидлади.
ЖССТ июль ойида Ҳинд океани минтақасидаги янги ўчоқларнинг Европа ва Америкага тарқалмаслиги учун шошилинч чоралар кўришга чақирган эди.
