Мактабгача ва мактаб таълими вазирлиги маълумотига кўра, 2025 йил давомида Ўзбекистон терма жамоалари 29 та халқаро фан олимпиадасида иштирок этиб, жами 210 та медални ютиб олди.
Жумладан, БААда бўлиб ўтган Халқаро кимё олимпиадасида 2 та олтин, Боливиядаги Халқаро информатика олимпиадасида эса Ўзбекистон тарихида илк бор кумуш медаль қўлга киритилди.
Шунингдек, ўқувчи қизлар илк бор Европа қизлар математика олимпиадасида қатнашиб, 1 та кумуш ва 2 та бронза медалга сазовор бўлди.
Тошкентда ўтказилган Ал-Хоразмий номидаги математика ва информатика олимпиадасида 50 та, Абу Райҳон Беруний номидаги кимё олимпиадасида эса 19 та медаль ютиб олинди.
Энг нуфузли халқаро олимпиадаларда ўзбекистонлик ўқувчилар жами 13 та медални қўлга киритган бўлса, минтақавий олимпиадаларда бу кўрсаткич 138 тага етди.
Аввалроқ, олимпиада ғолиблари ва уларнинг устозларини тақдирлаш учун давлат бюджетидан 12,4 миллиард сўм ажратилгани маълум қилинган эди.
