Суд ҳужжатларига кўра, мазкур иш 2025 йил 24 декабрь куни Жиноят ишлари бўйича Паяриқ туман судида кўриб чиқилган. Судда С.Б. айбига тўлиқ иқрор бўлган. У 2023 йил 1 май куни иш излаб Россиянинг Петропавловск-Камчатский шаҳрига борганини, дастлаб хусусий клиникада фельдшер бўлиб ишлаганини билдирган.
Кейинчалик танишлари орқали Россия Қуролли кучларига фельдшерлар қабул қилинаётгани, хорижий давлат фуқаролари ҳам ишга олинаётгани ва ойлик маош 210 минг рубль экани ҳақида маълумот олган. Шундан сўнг у ҳарбий хизматга ариза топширган ва Белград шаҳрига бориш топшириғини олган.
С.Б. суҳбатдан сўнг 11740-сонли ҳарбий қисмга ишга қабул қилиниб, икки йил давомида ҳарбий госпиталда фельдшер сифатида фаолият юритган. Хизмат давомида унга Россия фуқаролиги, ҳарбий гувоҳнома ва ҳарбий жетон берилган.
2025 йил июль ойида Ўзбекистонда унга нисбатан жиноят иши қўзғатилганини билгач, у 8-октабр куни таътилга чиқиб, қилган ишининг ноқонуний эканини англаб, жазога тортилиш учун Ўзбекистонга қайтган. Қайтишдан олдин Россия томонидан берилган ҳужжатларни йўқ қилгани маълум бўлди.
Cуд қарорига кўра, С.Б. Жиноят кодексининг 154-1-моддаси 2-қисми билан айбли деб топилиб, унга 4 йил муддатга озодликни чеклаш жазоси тайинланди.
